Kecha, 2-mart kuni Los Angeles shahrida 97-Oscar taqdirlash marosimi bo‘lib o‘tdi. Unda “Anora” beshta mukofot bilan bosh sovrinni qo‘lga kiritdi, jumladan, “Eng yaxshi film” va “Eng yaxshi aktrisa” nominatsiyalarida g‘olib bo‘ldi. Film rejissyori Shon Beyker bir kechada to‘rt Oscar mukofotini qo‘lga kiritgan ikkinchi shaxs bo‘ldi.
Adriyen Brodi (“The Brutalist”) va Mikki Medison (“Anora”) eng yaxshi aktyorlik mukofotlarini qo‘lga kiritishdi. Kiyeran Kalkin (“A Real Pain”) va Zoi Saldana (“Emilia Perez”) esa ikkinchi darajali rollar uchun taqdirlandi.
Eng yaxshi hujjatli film mukofoti “No Other Land”ga berildi. Film ijodkorlari sahnada Isroil hukumati tomonidan G‘arbiy Sohilda sodir etilayotgan adolatsizliklarga eʼtibor qaratishga chaqirdi.
Marosim Los-Anjelesda sodir bo‘lgan yong‘inlar qurbonlariga hurmat bajo keltirish bilan ham yodda qoldi.