Аргентинада норозилик намойишлари авж олди

 

Буэнос-Айрес марказида бўлиб ўтган норозилик намойиши полиция билан тўқнашувларга айланиб кетди. Хавфсизлик кучлари тартибсизликларни бостириш чоғида 150 кишини қўлга олди.

 

Аргентина хавфсизлик вазири Патрисия Булрихнинг маълум қилишича, воқеалар давомида 15-17 нафар полициячи жароҳатланган. "Намойишда қатнашганларнинг аксарияти мухлислар ва сўл гуруҳ вакиллари бўлиб, улар тажовузкор ҳаракатларга тайёр эди", деди у.

 

12 март куни Конгресс биноси ёнида уюштирилган норозилик акциясида нафақалар камлиги ва яшаш шароитининг оғирлигидан норози пенционерлар, шунингдек, уларни қўллаб-қувватлаган футбол мухлислари иштирок этди. Тахминан икки минг киши майдон ва унинг атрофида тўпланиб, ўз норозиликларини билдирган.

 

Намойиш бошланганидан кўп ўтмай, ҳуқуқ-тартибот ходимлари ва намойишчилар ўртасида тўқнашувлар юзага келди. Ёшлар полицияга таёқ, шиша ва тош отган, бунга жавобан полиция кўздан ёш оқизувчи газ ва сув пуркагичлардан фойдаланган. Намойишчилар баррикадалар қуришга, полиция машиналари ва ахлат қутиларига ўт қўйишга уринган.