Бекободда 28 ёшли аёл ўзини 5-қаватдан ташлаб юборди
Маълум бўлишича, аёлнинг турмуши нотинч бўлган, эри уни ваҳшийларча калтаклаб келган.
Тошкент вилоятининг Бекобод туманида 28 ёшли аёл ўзини 5-қаватдан ташлаб вафот этди.
Воқеа 27 март куни соат 21:30 ларда содир бўлган. Икки фарзанднинг онаси бўлган Н.X. яшаш хонадонининг 5-қаватидан ўзини ташлаб, ўз жонига қасд қилган.
Воқеа жойига туман прокурори, туман прокуратураси терговчиси, ИИБ бошлиғи ва бошқа тергов-тезкор гуруҳи аъзолари чиққан. Воқеа жойини кўздан кечириш давомида аёлнинг яшаш хонадонидан унинг бир дона телефон аппарати олинган. Ҳолат юзасидан суд-тиббий экспертиза тайинланган.
Яқинларининг айтишича, аёлнинг турмуши нотинч бўлган, эри ваҳшийларча калтаклаб келган. Тўққиз йиллик турмушнинг бор-йўғи уч йилини эриникида яшаган. Лекин шу орада уч марта ҳимоя ордери берилган бўлса ҳам зўравонга бирор чора кўрилмаган.
Бекобод туман прокуратураси томонидан воқеа юзасидан терговга қадар текширув ўтказилмоқда.
