Газ баллонларини ноқонуний тўплаш давом этмоқда: 20 октябрдан бери 9,4 мингдан ортиқ баллон аниқланди
Газ таъминоти тизими ходимлари билан боғлиқ ҳолатларда ҳам қонунбузилишлар аниқланиб, жумладан, бир ходимда 104 та газ баллони борлиги қайд этилган.
Ўзбекистонда, айниқса, табиий газ тармоғи етиб бормаган ҳудудларда аҳолини суюлтирилган газ билан барқарор таъминлашга алоҳида эътибор қаратилмоқда. Бироқ айрим шахслар аҳоли эҳтиёжи учун ажратилган газдан шахсий манфаат йўлида фойдаланишга уринмоқда.
Давлат хавфсизлик хизмати, Бош прокуратура, Ички ишлар вазирлиги, Фавқулодда вазиятлар вазирлиги, «Ўзенергоинспекция» ҳамда «Ҳудудгазтаъминот» АЖ ходимлари иштирокида ўтказилган назорат тадбирларида шундай қонунбузилишлар аниқланган.
Жумладан, 9 ноябрь куни ўтказилган тадбирларда 7 та ҳолатда жами 249 та газ баллони тижорий нархда сотиш мақсадида ноқонуний сақланаётгани маълум бўлган.
Аниқланган ҳолатлар орасида газ таъминоти тизими ходимлари билан боғлиқ қонунбузилишлар ҳам бор. Хусусан, Қорақалпоғистон Республикасида «Амударё тумангаз» бўлими суюлтирилган газ хизмати чилангари 104 та газ баллонини тегишли ҳужжатларсиз ва ёнғин хавфсизлиги қоидаларига зид равишда сақлагани аниқланган.
Сурхондарё вилоятида «Шерободтумангаз» таъминоти бўлими ҳайдовчиси ўз хонадонида 25 та газ баллонини сақлаган. Тошкент вилоятида эса «Қуйичирчиқ тумангаз» бўлими газ тўлдириш шохобчаси газ баллон тўлдирувчисида 3 та газ баллони борлиги қайд этилган.
Шунингдек, Наманган шаҳрида яшовчи, 1986 йилда туғилган шахс кейинчалик аҳолига сотиш мақсадида уйида 20 та газ баллонини сақлагани аниқланган.
Қашқадарё вилоятининг Касби туманида 1974 ва 1996 йилларда туғилган икки фуқаронинг хонадонларида жами 92 та газ баллони ёнғин хавфсизлиги қоидаларига зид равишда сақлангани қайд этилган. Хоразм вилоятининг Хонқа туманида эса 1995 йилда туғилган шахс маҳалладаги умумий овқатланиш шохобчасида газ идораларига тегишли, аҳоли учун ажратилган 5 та газ баллонидан ноқонуний фойдаланган.
Маълум қилинишича, жорий йилнинг 20 октябридан буён республика бўйича 370 та ҳолатда жами 9 455 та газ баллони ноқонуний сақланаётгани аниқланган. Улардаги суюлтирилган газ миқдори 102 158 килограммни ташкил этган.
