Арзон ижара ваъдаси билан фирибгарлик: Тошкентда сохта риэлторлар ушланди
Улар мижозларга ўзларини уй эгалари ёки риэлторлар сифатида таништирган.
Тошкент шаҳрининг Бектемир туманида OLX платформаси ва Теlegram орқали уй-жой ижараси билан боғлиқ фирибгарликда гумонланган икки киши ушланди. Бу ҳақда Ички ишлар вазирлиги Кибержиноятчиликка қарши курашиш департаменти хабар берди.
Маълум қилинишича, 26 ёшли Сардор ва 29 ёшли Хуршид уй-жойларни бозор нархидан анча арзон ижарага бериш ҳақида эълонлар жойлаштирган. Улар фуқаролар билан телефон орқали гаплашганда ва ёзишмаларда ўзларини уй эгалари, риэлтор ёки маклер сифатида таништирган.
Гумонланувчилар ижарага қизиқувчилардан олдиндан тўлов олгач, улар билан алоқани узган. Натижада 10 нафардан ортиқ фуқаро алданган.
Тезкор тадбир давомида жиноятга алоқадор деб топилган саккизта мобил телефон, 15 та SIM-карта ва 16 та банк картаси ашёвий далил сифатида олиб қўйилган.
Ҳолат юзасидан гумонланувчиларга нисбатан Жиноят кодексининг 168-моддаси 3-қисми (фирибгарлик) билан жиноят иши қўзғатилган.
