Маҳкумаларнинг фарзандлари учун боғчалар: икки жазони ижро этиш муассасасида марказлар очилади
3 ёшгача бўлган болалар учун тун-у кун фаолият юритадиган “Она ва бола марказлари” ташкил этилади.
Президентнинг 2026 йил 12 ноябрдаги қарори билан маҳкума аёлларнинг фарзандларини мактабгача таълим хизматлари билан қамраб олиш тизимини такомиллаштириш белгиланди.
Қарорга кўра, 2026 йил 1 декабрдан Ички ишлар вазирлиги тизимидаги 21-сон жазони ижро этиш колонияси қошидаги Болалар уйи негизида ҳамда 42-сон манзил-колонияда “Она ва бола марказлари” шаклидаги махсус давлат мактабгача таълим ташкилотлари ташкил этилади.
Марказларда 3 ёшгача бўлган болалар учун беш нафаргача тарбияланувчини қамраб оладиган, кеча-ю кундуз фаолият юритувчи гуруҳлар ташкил қилинади. Уларда болаларнинг яшаши, тиббий хизматдан фойдаланиши ҳамда ёшига мос ривожланиши учун зарур шароитлар яратилади.
Шунингдек, болалар озиқ-овқат, кийим-кечак, пойабзал ва бошқа зарур анжомлар билан таъминланади. Соғлиқни сақлаш вазирлиги уларнинг ўз вақтида эмланиши ва тиббий кўрикдан ўтказилишини ташкил этади.
Ижтимоий ҳимоя миллий агентлиги эса ҳар чоракда она ва бола учун яратилган шароитларни мониторинг қилиб боради.
