Шахсий суратлар эвазига 595 минг сўм: Бухорода товламачилик ҳолати фош этилди
Ижтимоий тармоқда танишган вояга етмаган қизни шантаж қилиб, ундан пул талаб қилган эркак аниқланди.
Республика миқёсида ўтказилаётган “Хавфсиз ва соғлом юрт” тадбирлари доирасида Ғиждувон туманида вояга етмаган қизни шантаж қилиб, ундан пул талаб қилган шахснинг ноқонуний ҳаракатларига чек қўйилди.
Маълум қилинишича, Фарғона вилоятининг Бағдод туманида яшовчи фуқаро ижтимоий тармоқлар орқали Ғиждувон туманида яшовчи, 2009 йилда туғилган қиз билан танишган. Мулоқот давомида ўзини Али деб таништирган эркак қизнинг шахсий тасвирларини интернетда тарқатиб юбормаслик эвазига ундан пул талаб қилган.
У қизни сир сақланиши лозим бўлган маълумотларни ошкор қилиш билан қўрқитиб, 2023 йил 18 октябрь куни ўртоғининг номига расмийлаштирилган банк картасига 595 минг сўм ўтказиб олишга эришган.
Мазкур ҳолат юзасидан фуқарога нисбатан Жиноят кодексининг 165-моддаси 1-қисми (товламачилик) билан жиноят иши қўзғатилиб, дастлабки тергов ҳаракатлари олиб борилмоқда.
