2024-yilda o‘rtacha haroratning yuqori darajaga ko‘tarilishi butun dunyo uchun xavotirli signalga aylandi. Biroq, shunga qaramasdan mamlakatlar bunga qarshi hech qanday chora ko‘rmayapti.
Ekseter universiteti olimi Geyl Uaytmanning so'zlariga ko'ra, insoniyat juda ham xotirjamlikka berilgan.
"Odamlar ko'ryapsizmi? Biz oxirgi nuqtaga yaqinlashmoqdamiz. Hayotimizda bo'layotgan bu o'zgarishlarga qarshi jiddiy chora ko'rishimiz lozim", - degan tadqiqotchi.
U Braziliyada bo'lib o'tadigan navbatdagi BMTning iqlim bo'yicha yirik sammitida ko'plab olimlar va ekologlar bu borada o'z fikrlarini bildirishiga ishonch bildirdi.
Kopernik iqlim oʻzgarishini monitoring qilish boʻyicha Yevropa xizmati maʼlumotlariga koʻra, 2024-yil 1850-yildan buyon dunyodagi eng issiq yil boʻldi, oʻrtacha yillik harorat birinchi marta meyordan oshib ketdi. BMT Jahon meteorologiya tashkiloti ma'lumotlarida aytilishicha, kelgusi besh yil ichida global harorat rekord darajaga yetishi mumkin. Bunga issiqxona gazlari va okean oqimlarining o'zgarishi sabab qilib keltirilgan. Bu hodisa nafaqat sayyoradagi o'rtacha haroratga, balki yog'ingarchilikka ham ta'sir qiladi. Mazkur o'zgartirish jarayoni 2023-yilning yozida boshlangan.