Britaniya hukumati Birmingem shahrida bir oydan ortiq davom etayotgan chiqindi inqiroziga qarshi kurashishda harbiy kuchlardan yordam so‘radi. The Daily Telegraph nashrining yozishicha, bosh vazir o‘rinbosari Anjela Rayner qurolli kuchlar yordamiga murojaat qilishga qaror qilgan. Ayni paytda shaharda 17 ming tonnaga yaqin axlat ko‘chalarda to‘plangan.
Harbiylar chiqindini to‘plashda bevosita ishtirok etmaydi. Ularning vazifasi operativ rejalashtirish va logistika sohasida moddiy-texnikaviy yordam ko‘rsatishdan iborat bo‘ladi. Nashr manbalariga ko‘ra, agar vaziyat yana-da og‘irlashsa, harbiylar soni ko‘paytirilishi mumkin.
Birmingemda chiqindi yig‘uvchilar 11 martdan beri ish tashlamoqda. Maʼlumotlarga ko‘ra, ish tashlashga chiqindilarni yig‘ish va qayta ishlash mutaxassislariga ish haqi to‘lash bilan bog‘liq kelishmovchiliklar sabab bo‘lgan. Shahar hokimiyati mazkur lavozimni “sanoat standartiga to‘g‘ri kelmaydi” deb baholagan, kasaba uyushmalari esa bu qaror 170 nafar xodimning ish haqidan mahrum bo‘lishi va boshqalarning ham maoshi kamayishiga olib kelishidan xavotirda. Ayni paytda, 1,2 millionga yaqin aholi istiqomat qiladigan shaharda sanitariya va salomatlik bilan bog‘liq favqulodda holat yuzaga kelmoqda.