Эстония Россия билан чегарани ёпади: қарор 1 декабрдан кучга киради
Эстония ҳукумати миллий хавфсизликни таъминлаш мақсадида Россия билан барча автомобиль чегара ўтказиш пунктларида ҳаракатни тўхтатишга қарор қилди.

Эстония ҳукумати 1 декабрдан Россия билан автомобиль орқали чегара кесиб ўтишни тўхтатиш тўғрисида қарор қабул қилди. Бу чора миллий хавфсизлик манфаатларини кўзлаб жорий этилмоқда.
Ҳукумат матбуот хизмати маълум қилишича, чеклов «Нарва-1», «Нарва-2», «Койдула», «Луҳамаа» ва «Саатсе» чегара ўтказиш пунктларига тааллуқли. Ҳукумат олти ойдан кейин қарорни қайта кўриб чиқиши мумкин.
Бош вазир Кристен Михаэльнинг айтишича, Эстония Россиянинг душманларча ҳаракатларига жавобан хавфсизлик чораларини кучайтирмоқда. Унинг таъкидлашича, мамлакат Россиянинг очиқликдан ўз манфаатлари йўлида фойдаланишига йўл қўймайди.
Шу билан бирга, амалдаги чекловлар ва қатъий божхона назорати остида юк ташувчи темирйўл қатнови давом этади.
Эстония ҳукумати Россия билан қуруқликдаги чегарани ёпиш нияти ҳақида 14 ноябрга ўтар кечаси мудофаа саноати корхонаси Threod Systems’га ўт қўйишга уриниш содир бўлганидан кейин маълум қилган эди. Мазкур ҳодиса юзасидан Латвиянинг саккиз нафар фуқароси қўлга олинган. Эстония томони диверсияни Россия разведкаси уюштирганини иддао қилган.
Аввалроқ Эстония президенти Юлле Мадизе ҳукуматни Россия билан чегарани ёпиш масаласида ҳиссиётларга берилмасликка чақирган эди.








