Украина тақдири Зеленскийсиз ҳал этилмайди — Трамп
АҚШ президенти можаро бўйича якуний қарор Украина президенти билан келишмасдан қабул қилинмаслигини айтди.

Дональд Трамп Украина можароси бўйича якуний қарорлар Украина етакчиси Владимир Зеленскийнинг иштирокисиз қабул қилинмаслигини билдирди. Бу ҳақда NBC News журналисти Гейб Гутьеррес Трамп билан суҳбатига таяниб маълум қилди.
Журналистнинг сўзларига кўра, у Трампдан Зеленскийнинг Украина бўйича қарорлар унинг иштирокисиз қабул қилинмаслиги кераклиги ҳақидаги баёноти юзасидан сўраган. АҚШ президенти бу фикрга қўшилганини айтган.
«Мен у билан розиман. Усиз ҳеч нарса қилмасдим — у бу мамлакатнинг етакчиси», — деган Трамп.
Украина масаласи Трампнинг Хитойнинг Шэньчжэнь шаҳрида Россия президенти Владимир Путин билан ўтказган икки томонлама учрашувида ҳам муҳокама қилинган. Путин бу мавзу Америка томонининг ташаббуси билан батафсил кўриб чиқилганини айтган. Трамп ҳам Украина можароси музокараларнинг асосий мавзуларидан бири бўлганини тасдиқлаган.
Россия президенти ёрдамчиси Юрий Ушаков Путин ва Трамп учрашувини Россия, АҚШ ва Хитой раҳбарлари иштирокидаги уч томонлама саммитга тайёргарлик сифатида таърифлаган. Саммит бошланишида Трамп ҳам Украина можароси муҳокама қилинишини билдирган.
Шунингдек, Трампнинг куёви Жаред Кушнер ва АҚШ президентининг махсус вакили Стив Уиткофф Германия канцлери Фридрих Мерцга Хитойдаги музокаралар ҳақида маълумот берган. Улар Берлиндаги «тайёрлар коалицияси» саммитида иштирок этган. Учрашувда Владимир Зеленский ҳам қатнашган.








