Трамп Путин урушдан чарчаганини айтди ва Европа ҳамда Украинани келишувга чақирди
АҚШ президенти Европа давлатларига Украинага миллиардлаб доллар сарфлаш ўрнига, маблағларни ўз эҳтиёжларига йўналтиришни маслаҳат берган.

АҚШ президенти Дональд Трамп Хитойда Россия президенти Владимир Путин билан музокаралардан сўнг Европа етакчилари ва Украина президенти Владимир Зеленскийни Россия билан тинчлик келишувига эришишга чақирди. Бу ҳақда The Washington Post нашри хабардор манбаларга таяниб хабар берди.
Нашр маълумотларига кўра, Берлинда Европа Иттифоқи етакчилари учрашуви бўлиб ўтаётган вақтда Трамп уларга Air Force One самолётидан қўнғироқ қилган. Суҳбат давомида у Путиннинг урушдан чарчаганини ва бир неча ой аввал рози бўлмаган айрим ён беришларга энди тайёр эканини айтган.
Шунингдек, АҚШ президенти Европа давлатларига Украинага миллиардлаб доллар сарфлаш ўрнига, маблағларни ўз мамлакатларининг эҳтиёжларига йўналтиришни маслаҳат берган.
Бироқ Путин Трамп билан учрашувдан кейин ҳам аввалги талабларини, жумладан, Украина қўшинларини Донбассдан олиб чиқиш шартини такрорлаган. Шунингдек, у Қрим кўпригига берилган зарбалардан кейин чекланган сулҳ бўйича музокараларни қайта бошлаш имкониятини рад этиб, жавоб ҳужумларини ваъда қилган.
Европа давлатлари раҳбарлари эса Украинани молиялаштиришда давом этиш ниятларини тасдиқлаган. Германия канцлери Фридрих Мерц Путин, Трамп ва Хитой раиси Си Цзиньпиннинг Шэньчжэньдаги учрашувини «фотосуратга тушиш учун баҳона» деб атаган. Франция президенти Эммануэль Макрон эса Украинанинг НАТОга аъзолиги масаласини қайта кўриб чиқишни таклиф қилган.
АҚШ президентининг махсус элчилари Жаред Кушнер ва Стив Виткофф Вашингтон Европа иштирокида тинчлик келишувига эришишга умид қилаётганини билдирган.
Кушнернинг айтишича, АҚШ Россияни НАТО Низомининг 5-моддасига ўхшаш тарзда Украина учун Ғарб хавфсизлик кафолатларини қабул қилишга яқинлаштиришга муваффақ бўлган.







