Sayohatchilar fikriga ko‘ra, dunyodagi eng lazzatli qahva Vyetnam, Kolumbiya va Italiyada tayyorlanadi.
Reddit foydalanuvchilari muhokama davomida turli mamlakatlarda qahvaning o‘ziga xos taʼmi va betakror lazzati haqida fikr bildirishdi. Ulardan biri Panamada joylashgan Boquete mintaqasidagi kichik qahva plantatsiyasida dunyoga mashhur Geisha qahvasini tatib ko‘rganini aytadi. Uning so‘zlariga ko‘ra, bu qahva jazmin, asal va tropik mevalarning noodatiy uyg‘unligini taqdim etib, har bir qultumida yangi taʼmni his qilish imkonini bergan.
Foydalanuvchilar orasida Vyetnam va Yaponiyada ham qahvaning o‘zgacha lazzati borligi taʼkidlandi. Ayniqsa, Vyetnamning Xanoy shahrida tayyorlanadigan tuxumli qahva ko‘pchilik tomonidan tavsiya qilindi.
Shuningdek, Kolumbiyaning dunyodagi eng yirik qahva ishlab chiqaruvchi mamlakatlardan biri ekanligi va bu yerda tayyorlangan qahvaning o‘zgacha lazzatga egaligi qayd etildi.
Yevropa mamlakatlari ichida esa Italiya va Ispaniyaning qahva madaniyati eng yuqori baholandi. “Men Italiyaga faqat kapuchino ichish uchun borgan bo‘lardim”, – deydi foydalanuvchilardan biri.
Komila Odilova tayyorladi