Jamiyat
|
13 Iyun 14:46
466
Jamiyat
|
13.06.2022, 14:46
466

"Har qanday holatda ham jurnalistga, tasvirchiga nisbatan, umuman... tazyiq o‘tkazish yoki tahdid qilish noto‘g‘ri!"

Sherzod Qudratxo‘ja “Sevimli” jurnalistlarining kaltaklangani yuzasidan munosabat bildirdi.

 

Xabaringiz bor, internet nashrlar va ijtimoiy tarmoqlarda joriy yilning 11 iyun kuni poytaxtimizdagi “Paxtakor” stadionida U-23 Osiyo kubogi chorak finali doirasida O‘zbekiston – Iroq o‘yinlarini yoritishga borgan O‘zMMAga aʼzo “Sevimli” telekanalining muxbiri va tasvirchisiga Ichki ishlar organlari va Milliy gvardiya xodimlari tomonidan kuch ishlatilgani haqida xabarlar keng tarqaldi

 

O‘zMMA ayni paytda mazkur holat yuzasidan o‘rganishlar olib bormoqda.

 

O‘zMMA Boshqaruvi raisi Sh.Qudratxo‘ja:

 

"Men o‘zim ham shu yerda edim, kuzatuvlarim ham bor. Pandemiyadan keyingi davrmi yoki odamlarimiz anchadan beri bu darajadagi futbol ko‘rmagani uchunmi, o‘sha kuni odamlarda ehtiros kuchli bo‘ldi. Bu esa baʼzan agressiya holatlarini keltirib chiqaradi. Tushunamiz, futbol millionlar o‘yini. Lekin biz Osiyo futbol federatsiyasi, sudyalari qarorlarini hurmat qilishimiz kerak. Biz o‘zimizning maydonda, jamoamiz uchun jon kuydiramiz. Shu bilan birga, o‘rnatilgan umumiy futbol qoidalari bor. O‘zbekiston hududida bunga amal qilishimiz lozim. Bu jihatdan biz o‘zimizga xos bo‘lgan vazminlikni, donishmandlikni ko‘rsatishimiz kerak. Afsuski, o‘sha kuni muxlislarning Iroq futbolchilariga va baʼzida bizning jurnalistlarga ham suv idishlari va og‘ir predmetli narsalarni otganlarini ham oqlab bo‘lmaydi.

Biz futbol tomoshabini bo‘lish madaniyatini o‘rganishimiz kerak. Mana ko‘ryapmizki, buning oqibatlari yaxshi bo‘lmayapti...

Endi “Sevimli” telekanali bo‘yicha... Bu haqida biz bir nechta manbalardan surishtiryapmiz. Chunki manbalar har xil maʼlumot berishmoqda. Har qanday holatda ham jurnalistga, tasvirchiga nisbatan, umuman media sohasidagi har bir odamga nisbatan kim tarafdan va qanday maqsadda bo‘lsa ham, kuch ishlatish, tazyiq o‘tkazish yoki tahdid qilish noto‘g‘ri!

O‘zMMA nomidan "kuchishlatar tizim"larni, o‘sha kuni futbol xavfsizligiga javob bergan tizimlarni media olami va uning vakillariga bunday qilmaslikka chaqiramiz!"

 

Albatta, OAV xodimlariga kasbiy tazyiq ko‘rsatish, ularga nisbatan kuch ishlatishni keskkin qoralaydi hamda bu Qonunchilikka zid faoliyat deb hisoblaydi.

tags: