Ҳоланднинг ҳолати ҳақида маълумот берилди
Дортмунднинг “Боруссия” клуби ҳужумчиси Эрлинг Ҳоланднинг отаси Алф-Инге футболчининг саломатлиги ҳақида гапирди:
“Ҳозирги ҳолатни ҳисобга оладиган бўлсак, Эрлингнинг соғлиги унчалик ёмон эмас. Лекин тўлиқ тикланиши учун ҳали вақт керак бўлади. Агар у 25 декабргача ҳеч бўлмаса бир-икки ўйинда майдонга тушса, ажойиб бўларди, лекин бу ҳозирча даргумон”.
Бундан олдин “Боруссия” бош мураббийи Марко Роуз Ҳоланднинг бир нечта ўйинни ўтказиб юбориши мумкинлигини айтганди. Аммо, афтидан, норвегиялик ўйинчи жиддий жароҳат олган кўринади.
Ҳоланд тахминан бир ойдан буён жароҳати туфайли ўйинларни ўтказиб юборяпти. Норвегиялик футболчи Бундеслиганинг 8-туридан ўрин олган “Майнз”га қарши ўйинда жароҳат олган эди.
Эслатиб ўтамиз, Эрлинг Ҳоланд “Боруссия Д” сафида ўтган мавсум 49 та ўйин ўтказиб, 49 та гол уришга эришди. Жорий йилги чемпионатда эса у 10 та учрашувда 13 та гол урди.
Аввалроқ “Бавария” Левандовски ўрнига Ҳоландни ўз сафига қўшиб олмоқчилиги ва инвестиция фондлари “Барселона”га Ҳоландни сотиб олишга ёрдам бермоқчилиги ҳақида хабар берилганди.
Жамшидбек Амиров
