Коронавирус туфайли шифохонага ётқизилганлар сони ошди
Ўтган йилнинг декабрь ойида қарийб 10 000 нафар киши касаллик қурбони бўлди.
Ўтган ойда COVID-19 туфайли шифохонага ётқизилганлар сони 42 фоизга ошган. Соғлиқни сақлаш вазирлиги Жаҳон соғлиқни сақлаш ташкилотига таяниб хабар берди.
Айтилишича, ҳозир COVID-19 инсоният учун глобал таҳдид эмас. Пандемия бекор қилинганидан буён 9 ой ўтди. Аммо ҳали ҳам вирус мутацияга учрашда давом этяпти. Ачинарли жиҳати, инфекцияни юқтириш ва ўлим ҳолатлари яна кўпаймоқда.
Хусусан, Жаҳон соғлиқни сақлаш ташкилоти бош директори Тедрос Гебрейесуснинг маълум қилишича, ўтган йилнинг декабрь ойида коронавирус ташхиси қўйилганлар сони сезиларли даражада ошган.
"Буни Янги йил байрами арафасида савдо расталари, томошагоҳ ва бошқа жамоат жойлари нисбатан гавжум бўлгани ҳамда "омикрон" штаммининг янги JN.1 варианти кенг тарқала бошлагани билан изоҳлаш мумкин", — дейилади хабарда.
Мисол учун, декабрь ойида COVID-19 оқибатида қарийб 10 000 нафар киши ҳаётдан кўз юмган, инфекция туфайли госпитализация қилинганлар сони ноябрь ойига нисбатан 42 фоиз, интенсив терапия бўлимига ётқизилганлар эса 62 фоизга ошган.
Ўсиш динамикаси кузатилаётган ҳудудлар орасида Европа ва Америка минтақасида жойлашган давлатлар етакчи. ЖССТ раҳбари ушбу эпидемиологик вазиятни ҳисобга олиб, коронавирусга қарши эҳтиёт чораларини изчил давом эттириш зарурлигини таъкидлади.
"Бу борада арзон ва ишончли синамалар, тавсия этилган даволаш усуллари, тиббий ниқоб ҳамда касалликка қарши вакциналар яхши самара беради. Ҳукуматлар ушбу масалага алоҳида эътибор қаратишлари керак", — деб қайд этди Гебрейесус.
