Навоийда газ қуйиш шахобчаси портлади
Навоий шаҳрида 12 август куни пропан газ қуйиш шахобчаси портлагани ҳақида хабарлар тарқалганди.
Фавқулодда вазиятлар вазирлиги ушбу хабар юзасидан маълумот берди.
Қайд этилишича, соат 19:16 да Кимёгарлар кўчасида жойлашган пропан газ қуйиш шахобчасида ёнғин содир бўлаётгани тўғрисида Фавқулодда вазиятлар бошқармасига хабар келиб тушган.
Ушбу ҳолат бўйича ёнғин жойига 9 та ёнғин-қутқарув экипажи жалб этилган. Биринчи ёнғин-қутқарув экипажи соат 19:18 да воқеа жойига етиб бориб, соат 19:45 да ёнғин қуршаб олинган ва соат 19:53 да ёнғин батамом ўчирилган.
Ёнғин келиб чиқиш сабаби «ЗИЛ-130» русумли «пропан» ёқилғи ташиш автомобили ўзидаги суюлтирилган газни тўкиш вақтида чақнаш содир бўлган, натижада юк автомобилига фойдаланиш учун ўрнатилган газ балони ёрилиши оқибатида, ёнғин келиб чиққан. «ЗИЛ-130» русумли суюлтирилган ёқилғи ташиш автомобилига ўрнатилган сиғимга зарар етмаган.
Ҳодиса оқибатида шахобча яқинидан ҳаракатланиб кетаётган «Москвич-412» русумли автомашина ҳайдовчиси ва 3 нафар йўловчиси турли даражада куйиш тан жароҳатини олган, ҳалок бўлганлар йўқ.
