Очлар исёни содир бўлиши хавфи бор — ЖСТ
Шунингдек, Украинадаги урушнинг озиқ-овқат бозорига таъсири очиқланди.
Бутун дунёда озиқ-овқат маҳсулотлари нархининг ўсиши энг қашшоқ давлатларда очлик билан боғлиқ исёнларга сабаб бўлиши мумкин. Бу ҳақда Жаҳон савдо ташкилоти бош директори Нгози Оконжо-Ивеала маълум қилди.
"Биз ўта эҳтиёткор бўлишимиз керак. Озиқ-овқат маҳсулотлари нархининг ўсиши ва очликнинг таъсири кейинги икки йилда янада сезилиши мумкин. Овқат ва энергия бутун дунёдаги камбағаллар истеъмол саватида энг кўп ўрин эгаллайди", — деган у.
Шунингдек, Оконжо-Ивеала бу йил Украинада уруғ экиш мавсуми бўлмаслигидан хавотир билдирган. Бутунжаҳон озиқ-овқат дастури захирасидаги буғдойнинг ярмини айнан Украина етказиб беради.
"Агар биз уруш таъсирини камайтиришининг чорасини кўрмасак, шу ва кейинги йилларда яна бир ҳалокатнинг гувоҳи бўламиз", — деб таъкидлаган Оконжо-Ивеала.
У 2000 йилларнинг иккинчи ярмида айрим давлатларда кузатилган очлар исёни қайта юз беришидан огоҳлантирган.
Эслатиб ўтамиз, аввалроқ "катта еттилик"нинг озиқ-овқат танқислигига қарши курашишга келишиб олгани маълум қилинганди.
