Videokonferensiyada o‘tkaziladigan yalpi majlisda senatorlar «Favqulodda holat to‘g‘risida»gi Konstitutsiyaviy qonunni ko‘rib chiqadi. Shuningdek, «Gidrometeorologiya faoliyati to‘g‘risida»gi qonuni ham o‘sha kuni muhokama markazida bo‘ladi. Bu haqda Senat Axborot xizmati xabar berdi.
Bundan tashqari, yalpi majlisda intellektual mulk, isteʼmolchilar huquqlarini himoya qilish, fuqarolik, og‘ir ijtimoiy ahvolda qolgan xotin-qizlar huquqlari kafolatlarini taʼminlash to‘g‘risidagi masalalari ham shu kunning mavzusi bo‘ladi. Qo‘shimcha tarzda, o‘simliklar karantini va himoyasi kabi sohalarda qonunchilikka qo‘shimcha va o‘zgartishlar kiritish takliflari ham muhokama qilinadi.
Shu bilan birga, «Transport va moliya sohalaridagi ayrim huquqbuzarliklarni sodir etganlik uchun maʼmuriy jazolar liberallashtirilishi munosabati bilan O‘zbekiston Respublikasining Maʼmuriy javobgarlik to‘g‘risidagi kodeksiga o‘zgartishlar kiritish haqida»gi qonun hujjatlari ham ko‘rib chiqilishi rejalashtirilmoqda.
Yalpi majlisda Inson huquqlari bo‘yicha O‘zbekiston milliy markazi direktorining inson huquqlari sohasidagi xalqaro majburiyatlarining bajarilish holati haqidagi axborotini eshitish ham o‘rin olgan.
Bundan tashqari, Senatorlar aholini ichimlik suvi bilan taʼminlashdagi muammolar yuzasidan Vazirlar Mahkamasiga yuborilgan parlament so‘rovi natijalarini ko‘rib chiqadi.
Eslatma. 18 noyabr kuni bo‘lib o‘tadigan Oliy Majlisi Senatining yigirma birinchi yalpi majlisida homilador va reproduktiv yoshdagi ayollar hamda go‘daklarga ko‘rsatilayotgan tibbiy yordam holati hamda yengil sanoat va charm sanoati korxonalarida xotin-qizlarning mehnat munosabatlari bilan bog‘liq masalalarda ish beruvchilarning masʼuliyatini oshirish bo‘yicha Vazirlar Mahkamasiga parlament so‘rovlari yuborish masalalari muhokama etiladi.
Shuningdek, fan, taʼlim va sog‘liqni saqlash masalalari qo‘mitasining 2020 yil va 2021 yilning o‘tgan davridagi faoliyati yuzasidan hisobotini ham eshitish rejalashtirilgan.
Olamgir Abdiyev