Тошкентда ота 190 млн алиментни олдиндан тўлади
Шу тариқа уч нафар фарзанднинг таъминоти кафолатланди.
Мажбурий ижро бюросининг Сергели туман бўлими томонидан олиб борилган ижро ҳаракатлари натижасида уч нафар вояга етмаган фарзанд таъминоти учун алимент қарздорлиги тўлиқ ундирилиб, қўшимча равишда 190 миллион сўм алимент пули олдиндан ундирувчига тўлаб берилди.
Фуқаролик ишлари бўйича Яккасарой туманлараро судининг 2021 йил 28 августдаги суд буйруғига асосан қарздор А.Д.дан ундирувчи А.Г. фойдасига вояга етмаган уч нафар фарзанди таъминоти учун иш ҳақи ва бошқа даромадларининг 1/2 қисми миқдорида алимент ундириш белгиланган.
Мазкур ижро ҳужжати бўлим иш юритувига келиб тушганидан сўнг алимент тўловларининг ўз вақтида амалга оширилишини таъминлаш юзасидан тегишли ижро ҳаракатлари олиб борилган. Жумладан, қарздорнинг Ўзбекистон Республикасидан чиқиш ҳуқуқи 2023 йил 12 октябрда қонунчиликда белгиланган тартибда вақтинча чекланган.
2026 йил 1 сентябрь ҳолатига қарздорнинг тўланмаган алимент қарздорлиги 12 миллион 820 минг сўмни ташкил этган.
Бюро давлат ижрочилари томонидан олиб борилган мажбурий ижро ҳаракатлари давомида 2026 йил 20 сентябрь куни қарздордан 12 миллион 820 минг сўм алимент қарздорлиги тўлиқ ундирилиб, ундирувчига тўлаб берилди.
Шунингдек, 2026 йил 28 сентябрь куни қарздорнинг қариндоши томонидан унинг уч нафар фарзанди келажакдаги таъминотини таъминлаш мақсадида 190 миллион сўм алимент пули тўлаб берилди.
Натижада жами 202 миллион 820 минг сўм маблағ ундирувчига ундирилиб, фарзандларнинг моддий таъминоти билан боғлиқ мажбуриятлар ижроси таъминланди.
