Олмалиқда “пешеход”дан ўтаётган пиёдани машина уриб кетди
ЙТҲ оқибатида пиёда воқеа жойида вафот этган.
Тошкент вилояти ЙҲХБнинг маълум қилишича, ЙТҲ кеча тунда, соат 00:05ларда содир бўлган. Олмалиқ шаҳрининг Амир Темур кўчасида 2005 йилда туғилган О.Ш. Nexia машинасини бошқариб кетаётиб, тартибга солинмаган пиёдалар ўтиш жойидан йўлни кесиб ўтаётган 50 ёшли У.А.ни уриб юборган.
ЙТҲ оқибатида пиёда воқеа жойида вафот этган. Ҳолат юзасидан терговга қадар суриштирув ишлари бошланган.
Аввалроқ Тошкент вилоятининг Юқори Чирчиқ туманида Cobalt русумли автомобиль йўлдан ўтаётган 11 ёшли мактаб ўқувчисини уриб кетганди.
