Тошкентда ҳаво сифати: 15 ноябрь тонгида яхшиланиши мумкин
Ҳозирда атмосфера ҳавоси сифати Махсус комиссия томонидан доимий мониторинг қилинмоқда.
15 ноябрга ўтар кечаси Тошкент шаҳрида ҳаво сифати ўзгариши мумкин. Прогнозларга кўра, кечки соатларда ҳаво сифати Халқаро ҳаво сифати индекси (АQI) бўйича дастлаб “ўртача”, соат 21:00 дан тонггача “сезгир гуруҳлар учун носоғлом” даражада бўлиши кутилмоқда. Миллий ҳаво сифати индекси бўйича шаҳар ўртача кўрсаткичи асосан “яшил”, айрим муддатларда “сариқ” даражада бўлиши мумкин.
Қайд этилишича, тунда ҳаво ҳароратининг пасайиши, жуда кучсиз шамол ва кучли ҳарорат инверсияси атмосферанинг қуйи қатламларида ҳаво алмашинувини чеклайди. Ушбу шароит маҳаллий ва қўшни ҳудудларда шаклланган ташламалар ва PМ заррачаларининг тарқалишини сусайтириб, ер юзасига яқин қатламда сақланиб қолишига шароит яратади.
Прогнозларга кўра, 15 ноябрь тонгги муддатларда инверсиянинг кучсизланиши ҳаво сифатини яхшилайди. Соат 10:00 га келиб ҳаво сифати Халқаро АQI бўйича “ўртача”, миллий индекс бўйича “яшил” даражага тушиши мумкин.
