Овқатланаётганда нега суюқлик ичиш тавсия этилмайди?
Олимлар ва диетолог-мутахассисларнинг таъкидлашича, сув инсон саломатлиги учун жуда муҳим озиқа саналади. Шу боис, улар бир кунда икки литрга яқин сув ичишни тавсия этади. Кофе, чой ва бошқа ичимликлар эса сув ўрнини боса олмайди. Сув ичиш жараёнида қанча ичиш эмас, балки қандай ва қайси вақтда ичиш аҳамиятлидир. Сувни овқатдан аввал ва кейин истеъмол қилиш керак. Бу одат саломатликка ижобий таъсир кўрсатади.
Хўш, таом тановул қилиш пайтида сув ичилса қандай оқибатларга олиб келиши мумкин? Келинг, биргаликда билиб оламиз.
Мутахассисларнинг айтишича, ошқозон билан боғлиқ кўп муаммолар овқатни сув билан ичиш оқибатида юзага келади. Чунки ичимликлар сўлак ишлаб чиқариш жараёнини сусайтиради. Сўлак эса овқат ҳазми учун жуда муҳим.
Овқатланаётганда сув ичиш ошқозонда шиллиқ ишлаб чиқариш жараёнини ҳам издан чиқаради. Бу, ўз навбатида, овқат ҳазмига салбий таъсир кўрсатади. Чунки овқат истеъмол қилаётиб, сув ичилса луқма чайналмай ютилади. Етарлича чайналмаган овқат ошқозонга тушишади. Оқибатда, ҳазм қилиш тизимининг қуйи қисмида уларнинг қонга сўрилиш жараёни издан чиқиши мумкин.
Шунингдек, ёғли таомлар ейилаётганда муздек ичимлик ичиш ҳам зарарли. Чунки бундай ҳолатда совуқ таъсирида луқма ошқозонда “қотиб қолади”. Шу боис, таомланаётганда иссиқ ёки совуқ ичимликлар ичмаган маъқул. Уларни овқатлангандан ярим ёки бир соат ўтгач ичиш тавсия этилади.
Муҳим тавсиялар: Сувни таомдан аввал ичинг. Бу орқали сиз керагидан ортиқ таом емаслик, шунингдек, таом вақти тўйганингиз ёки тўймаганингизни холис ва аниқ баҳолашга муваффақ бўласиз.
Озода Чориева
