Путин ва Зеленскийга мактуб: Мелания Трамп Россия ва Украина вакиллари билан учрашди
Учрашувда Олешки шаҳридаги гуманитар операция ва икки давлат билан ҳамкорлик масалалари муҳокама қилинди.
5 ноябрь куни АҚШнинг биринчи хоними Мелания Трамп Оқ уйда Россия ва Украина вакилларини қабул қилди. Учрашув октябрь ойи охирида Херсон вилоятининг Олешки шаҳрида ўтказилган гуманитар операциядан сўнг ташкил этилди.
Россия делегацияси таркибида Россия Инсон ҳуқуқлари бўйича вакили Яна Лантратова ва президентнинг хорижий давлатлар билан инвестициялар ҳамда иқтисодий ҳамкорлик бўйича махсус вакили Кирилл Дмитриев иштирок этди. Украинани эса мамлакат омбудсмани Дмитрий Лубинец ва «Халқ хизматкори» фракцияси раҳбари Давид Арахамия вакиллик қилди.
Мелания Трамп Олешки шаҳридаги гуманитар операция кенг кўламли тинчликка олиб келишига умид билдирган. Унинг таъкидлашича, ҳар қандай муҳим ўзгариш кичик бир қадамдан бошланади.
Биринчи хоним операцияни режалаштиришнинг барча босқичларида иштирок этганини айтган. Жумладан, миналардан тозалаш режалари ва сунъий йўлдош тасвирлари билан танишган, йўлларни баҳолаш, эвакуация йўналишлари, шифохоналарга кириш имконияти, транспорт ҳамда тиббий воситалар масалаларини муҳокама қилган.
У Россия ва Украина томонларининг сулҳ давридаги ҳаракатларини ҳам юқори баҳолаган. Унинг сўзларига кўра, гуманитар ходимлар, ҳарбийлар ва икки давлат расмийлари операциянинг барча босқичларини мувофиқлаштириш учун биргаликда ишлаган.
Учрашув давомида Мелания Трамп Россия президенти Владимир Путин ва Украина президенти Владимир Зеленскийга ёзган мактубларини ҳам тилга олган. Учрашув иштирокчиларидан ушбу хатларни давлат раҳбарларига етказишни сўраган.
Россия президентига мактубни Кирилл Дмитриев топшириши кутилмоқда. У Мелания Трамп Олешки шаҳридаги операция муваффақиятида муҳим роль ўйнаганини таъкидлаб, биринчи хоним гуманитар фаолиятини давом эттиришига умид билдирган.
Дмитриевнинг айтишича, Москва ва Вашингтон оилаларни бирлаштириш ҳамда болаларни ҳимоя қилишга қаратилган гуманитар йўналишдаги ҳамкорликни давом эттириши керак.
