Ўзбекистонда кўз тўр пардасини кўчириб ўтказиш жарроҳлик амалиёти жорий этилиши мумкин
Ушбу амалиёт Ўзбекистонда жорий қилинса, кўриш қобилиятидан маҳрум бўлган беморлар қайта кўриш имкониятини қўлга киритади.
Республика ихтисослаштирилган кўз микрохирургияси илмий-амалий тиббиёт марказида халқаро миқёсда симпозиум бўлиб ўтди. Унда АҚШ, Буюк Британия, Швейцария ва Ўзбекистоннинг профессор олимлари ўзларининг илмий маърузалари билан иштирок этди. Бу ҳақда Соғлиқни сақлаш вазирлиги хабар берди.
Симпозиумда британиялик профессор Гордон Плант неврология ва нейроoфтальмология йўналишларида қандай фундаментал текширувлар мавжудлиги ва соҳадаги сўнгги янгиликлар тўғрисидаги маърузаси билан қатнашди. Яна бир британиялик профессор Линдон Да Круз регенератив тиббиёт хусусида маъруза ўқиди. Кўз тўр пардаси кўчириб ўтказиш амалиётини ўз ичига олган маърузада олим 20 йиллик тажрибаси билан бўлишди. Кўзнинг тўр пардасини муваффақиятли кўчириб ўтказиш бўйича 20 йил ичида қандай текширув ва тадқиқотлар ўтказилгани ҳақида маълумот берди.
«Илгари бу борада гап кетганда ’умуман иложи йўқ‘, дер эдик. Кўп йиллик илмий изланишлар натижасида бунинг имкони борлиги исботланди», — дейди марказ директори Азамат Юсупов.
Юсуповнинг таъкидлашича, эндиликда ушбу лабораторияларнинг қандай ташкил этилгани, уларни Ўзбекистонда ҳам жорий этиш бўйича ўрганиш олиб борилиши режалаштирилмоқда. Агар бу амалиёт Ўзбекистонда ҳам қўллана бошланса, тўр парда билан боғлиқ касалликлар туфайли кўриш қобилиятидан маҳрум бўлган беморлар дунёни яна ўз кўзлари билан қайта кўра олиш имкониятига эга бўлади.
