Qo‘qonda “Jihodchilar” oqimi tarafdorlari faoliyatiga chek qo‘yildi

Bu xaqida DXX matbuot xizmati xabar berdi.

Aniqlanishicha, duradgorlik bilan shug‘ullanuvchi, 1998 y.t. shaxs muqaddam Turkiyaning Istambul shahrida ishlagan vaqtida “Tavhid va jihod katibasi” terroristik tashkiloti emissarlari taʼsiriga tushadi va keyinchalik yashash manziliga qaytib kelgach, mazkur tashkilot g‘oyalarini atrofdagilarga targ‘ib qila boshlaydi. Natijada 9 kishidan iborat guruh shakllanadi.

18-27 yosh oralig‘ida bo‘lgan guruh aʼzolari orasida reklama agentligida va poyabzal ishlab chiqarish sexida ishlovchi, shuningdek, uy sharoitida bolalar kiyimlari ishlab chiqarish va sartaroshlik bilan shug‘ullanuvchi shaxslar bor.

Taʼkidlash lozimki, ular Qo‘qon shahrining turli mavzelarida to‘planib, xalqaro terroristik tashkilotlarning g‘oyaviy rahnamolari bo‘lgan “Abu Saloh”, “Abdulloh Zufar”, “Abdulloh Buxoriy”, “Abdulloh domla”larning “hijrat” va “jihod” to‘g‘risidagi maʼruzalari hamda daʼvatlarini tinglab, o‘zaro muhokama qilishgan. Shuningdek, ular kelgusida Suriyadagi terroristik tashkilotlar safiga borib qo‘shilishni rejalashtirishgan.

Guruh aʼzolarining mobil telefon apparatlarida respublikamiz qonunchiligida taʼqiqlangan audio-video ko‘rinishidagi diniy materiallar borligi aniqlandi.

Hozirda Jinoyat Kodeksining tegishli moddalariga asosan jinoyat ishi qo‘zg‘atilib, tergov harakatlari olib borilmoqda.