Қўқондаги мактабга бегона шахслар кирмоқчи бўлди

 

6 март куни соат 16:10 ларда Қўқон шаҳрида жойлашган 4-сонли мактабда янги тизимдаги қоровуллик хизматини олиб бораётган ходим томонидан ушбу мактаб атрофида мақсадсиз юрган ва мактаб ҳудудига кирмоқчи бўлган тўрт нафар бегона шахс тўхтатилган.

 

Қўриқлаш бўлими ходими ташвиш тугмаси орқали қўриқлаш бўлимига хабар бериш билан бирга, улардан нима мақсадда келганликларини сўраб, мактабга бегоналар кириши мумкин эмаслигини ва жорий қилинган янги тартиб-қоидалар тўғрисида тушунтиришга ҳаракат қилганида, улар тушунишни истамасдан аксинча қоровул ходимининг қонуний талабларини бажармасдан, ўзларининг ножўя хатти-ҳаракатлари билан қўполлик қилишга ўтишган.

 

Шу вақтда чақирувга асосан етиб келган қўриқлаш тезкор гуруҳи ходимлари уларнинг хатти-ҳаракатларини чеклаб, ҳолатга ойдинлик киритиш учун мактаб  ҳудудидан олиб кетишган.  

 

Миллий гвардия масъул ходимлари томонидан олиб борилган дастлабки суриштирув ишлари давомида улар Қўқон шаҳрида туғилган фуқаролар, 19 ёшли М.Я., муқаддам Жиноят кодексининг 109-моддаси ("қасддан енгил тан жароҳати етказиш") бўйича судланган, 22 ёшли К.М., муқаддам Жиноят кодексининг 104-моддаси ("қасддан оғир тан жароҳати етказиш") бўйича судланган, 16 ёшли Т.У., муқаддам унинг ота-онасига нисбатан Маъмурий жавобгарлик тўғрисидаги кодeксининг 47-моддаси билан (болаларни тарбиялаш ва уларга таълим бериш борасидаги мажбуриятларни бажармаслик) жавобгарлик белгиланган, ва 18 ёшли Р.Р., мазкур мактабнинг собиқ ўқувчиси эканлиги маълум бўлган.

 

Ушбу фуқароларнинг хатти-ҳаракатларида ЎзР МЖтКнинг 183, 194-1, 195-1 моддаларида кўрсатилган ҳуқуқбузарлик аломатлари мавжудлиги сабабли уларга нисбатан тегишли тартибда маъмурий баённома расмийлаштирилган.  

 

Ҳозирда тўпланган ҳужжатлар Суд органларига юбориш чоралари кўрилмоқда.