Ijtimoiy tarmoqlarda nomaʼlum shaxs tomonidan qoramollarda yuqumli kasallik tarqalgani tufayli har joydan ham go‘sht sotib olmaslikka chorlovchi audioxabar tarqalib, turli muhokamalarga sabab bo‘ldi.
Holat Qishloq xo‘jaligi vazirligi huzuridagi Veterinariya va chorvachilikni rivojlantirish qo‘mitasi hamda tegishli idora vakillari hamkorligida atroflicha o‘rganildi.
O‘rganish natijalariga ko‘ra, so‘nggi olti oy davomida hududdagi chorva mollarida biror bir kasallik aniqlanmaganligi, qoramollar sog‘lom parvarish qilinayotgani aniqlangan.
Binobarin, yolg‘on va asossiz xabar tarqatgan audioxabar egasi Farg‘ona viloyati, Buvayda tumani “Buyuk ipak yo‘li” MFY da istiqomat qiluvchi fuqaro Feruza Tursunova ekanligi maʼlum bo‘lgan. Fuqaro F.Tursunovaga yolg‘on xabar berish, vahima uyg‘otuvchi asoslanmagan maʼlumot tarqatish uchun qonunchilikda jiddiy jazo borligi tushuntirilib, mutasaddi idoralar tomonidan ogohlantirilgan.