Қорамолларда юқумли касаллик тарқалгани рад этилди
Қишлоқ хўжалиги вазирлиги ҳолат бўйича маълумот берди.
Ижтимоий тармоқларда номаълум шахс томонидан қорамолларда юқумли касаллик тарқалгани туфайли ҳар жойдан ҳам гўшт сотиб олмасликка чорловчи аудиохабар тарқалиб, турли муҳокамаларга сабаб бўлди.
Ҳолат Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси ҳамда тегишли идора вакиллари ҳамкорлигида атрофлича ўрганилди.
Ўрганиш натижаларига кўра, сўнгги олти ой давомида ҳудуддаги чорва молларида бирор бир касаллик аниқланмаганлиги, қорамоллар соғлом парвариш қилинаётгани аниқланган.
Бинобарин, ёлғон ва асоссиз хабар тарқатган аудиохабар эгаси Фарғона вилояти, Бувайда тумани “Буюк ипак йўли” МФЙ да истиқомат қилувчи фуқаро Феруза Турсунова эканлиги маълум бўлган. Фуқаро Ф. Турсуновага ёлғон хабар бериш, ваҳима уйғотувчи асосланмаган маълумот тарқатиш учун қонунчиликда жиддий жазо борлиги тушунтирилиб, мутасадди идоралар томонидан огоҳлантирилган.
