13 ёшли қизга нисбатан зўравонлик иши: жиноят оғирроқ модда билан қайта малакаланди
Жабрланувчига Ижтимоий ҳимоя миллий агентлиги томонидан психологик ва юридик ёрдам кўрсатилмоқда.
Фарғона вилоятининг Қўқон шаҳридаги меҳмонхонада 13 ёшли қизга нисбатан содир этилган жинсий зўравонлик юзасидан қўзғатилган жиноят иши оғирроқ модда билан қайта малакаланди. Бу ҳақда Болалар омбудсмани хабар берди.
Маълум қилинишича, 9 ноябрь куни Қўқон шаҳар прокуратураси жиноят ишини Жиноят кодексининг 128-моддасидан (16 ёшга тўлмаган шахс билан жинсий алоқа қилиш) 118-моддаси 4-қисмига (ўн тўрт ёшга тўлмаган шахснинг номусига тегиш) қайта малакалаган.
Ҳодиса 28 сентябрь куни содир бўлган. Фарғона вилоятида яшовчи, 2012 йилда туғилган вояга етмаган қиз Қўқон шаҳридаги меҳмонхонада жинсий зўравонликка учраган.
Мазкур ҳолат юзасидан 29 сентябрь куни Жиноят кодексининг 128-моддаси 3-қисми «а» банди билан жиноят иши қўзғатилган. Гумонланувчи ушланиб, 30 сентябрь куни суд қарори билан унга нисбатан қамоққа олиш тарзидаги эҳтиёт чораси қўлланилган.
Болалар омбудсманининг маълум қилишича, жабрланувчининг руҳий ҳолатини тиклаш ва қонуний манфаатларини ҳимоя қилиш мақсадида Ижтимоий ҳимоя миллий агентлиги масъул ходимлари томонидан унга психологик ҳамда юридик ёрдам кўрсатилмоқда.
Ҳозирда жиноят иши бўйича дастлабки тергов ҳаракатлари давом этмоқда. Болалар омбудсмани жабрланувчининг процессуал ҳуқуқлари таъминланишини ўз ваколатлари доирасида назорат қилиб боришини билдирган.
