Автобусларда чиптасиз юриш ҳолатлари: қоидабузарларнинг 92,4 фоизи 30 ёшгача бўлганлар
Январь–октябрь ойларида Тошкент автобусларида йўл ҳақини тўламаган йўловчиларга нисбатан 138 780 та маъмурий баённома расмийлаштирилди.
2026 йилнинг январь–октябрь ойларида Тошкент шаҳри автобусларида йўл ҳақини тўламасдан ҳаракатланган йўловчиларга нисбатан 138 780 та маъмурий баённома расмийлаштирилди. Бу ҳақда Транспорт вазирлиги маълум қилди.
Ёш тоифалари бўйича таҳлилга кўра, қоидабузарларнинг 97 747 нафари ёки 70,4 фоизи 18–30 ёшдагилар ҳиссасига тўғри келади. Яна 30 533 нафар ёки 22 фоиз йўловчи 16–17 ёшдагилар бўлган.
Шу тариқа, чиптасиз юрганларга нисбатан расмийлаштирилган жами маъмурий баённомаларнинг 92,4 фоизи 30 ёшгача бўлган шахсларга тўғри келган.
Жинслар кесимида эса қоидабузарликларнинг 105 272 таси ёки 75,9 фоизи эркаклар, 33 508 таси ёки 24,1 фоизи аёллар ҳиссасига тўғри келган.
Транспорт вазирлиги йўл ҳақини тўламаслик нафақат белгиланган тартибни бузиши, балки жамоат транспорти тизимининг молиявий барқарорлигига ҳам салбий таъсир кўрсатишини таъкидлади. Чунки автобусларнинг ўз вақтида ҳаракатланиши, техник ҳолатини сақлаш, ҳайдовчилар меҳнати ва хизмат сифатини таъминлаш молиявий маблағларга боғлиқ.
