Тошкентда иссиқ сув нега занглаб оқмоқда? Veolia изоҳ берди
Жўмракдан занглаган сув оқса, уни қисқа муддат оқизиб юбориш, сув тиниқлашмаса, бошқарув компаниясига мурожаат қилиш керак.
Иситиш мавсуми бошланиши билан Тошкент аҳолиси томонидан жўмраклардан ранги ўзгарган, занг аралаш иссиқ сув оқаётгани юзасидан мурожаатлар келиб тушмоқда. Veolia Energy Tashkent бундай ҳолатнинг сабабларини ва муаммони бартараф этиш учун ким масъул эканини тушунтирди.
Компания маълумотига кўра, иситиш тизими ишга туширилганда магистрал тармоқлар ва биноларнинг ички қувурларида гидравлик циркуляция режими ўзгаради. Натижада ёзги-кузги мавсумдаги танаффус давомида қувурларда тўпланиб қолган майда минерал чўкиндилар ва занг қолдиқлари сув босими таъсирида ювилиб чиқиши мумкин.
Veolia Energy Tashkent мутахассислари 1–7 ноябрь кунлари шаҳар магистрал иссиқлик тармоқларида дастлабки циркуляция ва ювиш ишларини амалга оширган. Компания магистрал тармоқлардаги сув сифати белгиланган меъёрий кўрсаткичларга келтирилганини билдирган.
Биноларнинг ички тармоқлари учун эса бошқарув компаниялари масъул ҳисобланади. Иситиш тизими ишга туширилганда улар қувурларда туриб қолган сувни чиқариб юбориши ва тизимни магистрал тармоқлардан келадиган сув билан тўлдириши керак.
Жўмракдан занглаган сув оқса, нима қилиш керак?
Veolia тушунтиришича, аксарият ҳолларда тик қувурда туриб қолган сувни қисқа муддат оқизиб юбориш орқали унинг ранги меъёрий ҳолатга қайтади.
Агар сув тиниқлашмаса, бошқарув компанияси уни тўлиқ тиниқлашгунча оқизиб юбориши лозим.
Бошқарув компанияси занглаган сув тўғридан-тўғри бинога кириш нуқтасидан келаётганини тасдиқлаган тақдирда, Veolia Energy Tashkent call-марказига мурожаат қилиш мумкин. Компания мутахассислари тармоқлар чегарасида сув параметрларини текшириш учун жойига чиқади.
