Surxondaryo viloyati Sho‘rchi tumanida 6 aprel kuni erkak va uning qizi uyda o‘lik holda topildi. Viloyat Ichki ishlar boshqarmasining maʼlum qilishicha, gumonlanuvchi Rossiyada aeroportda qo‘lga olindi.
Aniqlanishicha, soat 18:30larda tumanning Yakkabog‘ mahallasidagi uyda 1965 yil tug‘ilgan nafaqaxo‘r X.X.ning jasadi bo‘yin sohasiga o‘tkir tig‘li jism bilan yetkazilgan tan jarohati bilan topilgan. Shuningdek, uning 1992 yil tug‘ilgan qizi M.Z.ning jasadi yuqori nafas yo‘llari va bo‘yin aʼzolariga o‘tkir tig‘li jism yordamida yetkazilgan tan jarohati bilan aniqlangan.
Holat yuzasidan tuman prokuraturasi tomonidan Jinoyat kodeksining 97-moddasi (Qasddan odam o‘ldirish) 2-qismi bandlari bilan jinoyat ishi qo‘zg‘atilgan. Viloyat IIB Jinoyat qidiruv boshqarmasi tomonidan mazkur qotillik jinoyatini sodir etishda gumonlangan Sariosiyo tumanida yashovchi 1984-yilda tug‘ilgan N.S.ga nisbatan mahalliy va xalqaro qidiruv eʼlon qilingan.
O‘zbekiston va Tojikiston Jinoyat qidiruv bosh boshqarmalari hamkorlikda qidiruv ishlari amalga oshirgan. Gumondor N.S. javobgarlikdan qutulish maqsadida Surxondaryodan Tojikistonga o‘tib, u yerdan Rossiyaga ketgan. N.S. Moskva viloyatining Domodedovo aeroportida qo‘lga olingan. Hozirda gumondorni O‘zbekistonGA qaytarish choralari ko‘rilmoqda.