Табиий офат оқибатида зарар кўрган тадбиркорлар солиқлардан озод этилади
Мамлакатимизнинг табиий офатлар оқибатида катта зарар кўрган ҳудудларидаги тадбиркорларни қўллаб-қувватлаш, шунингдек, айрим ерини шўр босган ҳудудлар аҳолисига солиқ тўловлари бўйича енгилликлар бериш уларнинг турмуш даражасини яхшилашга туртки бўлади.
2021 йил 24 сентябрь куни Олий Мажлис Қонунчилик палатасининг навбатдаги мажлисида депутатлар “Ўзбекистон Республикасининг Солиқ кодексига қўшимчалар киритиш тўғрисида”ги қонун лойиҳасини биринчи ўқишда кўриб чиқди, — деб хабар берди Олий Мажлис Қонунчилик палатаси.
Унда айтилишича, Сирдарё вилоятининг Сардоба, Оқолтин ва Мирзаобод туманларида фавқулодда ҳодиса оқибатида зарар кўрган балиқчилик, чорвачилик ва паррандачилик хўжаликлари 2020 йил 1 майдан 2022 йил 1 ноябрга қадар ер ва мол-мулк солиқларини тўлашдан озод этилиши белгиланяпти.
Шунингдек, лойиҳада Сурхондарё вилоятида қайтадан ташкил этилган Бандихон, Қизириқ, Музработ ва Шеробод туманларида фаолият кўрсатадиган тадбиркорлик субъектларини 2024 йил 1 январга қадар ер солиғи, мол-мулк солиғи, айланмадан олинадиган солиқ ва якка тартибдаги тадбиркорлар учун даромад солиғини тўлашдан озод қилиш назарда тутилмоқда.
Депутатлар таъкидлашича, мазкур қонун лойиҳасининг қабул қилиниши тадбиркорлик субъектлари ва аҳоли орасида норматив-ҳуқуқий ҳужжатлар ҳар хил талқин қилинишининг олдини олишга, хорижий инвесторларни жалб қилишга, тадбиркорлик муҳити жозибадорлигининг ошишига хизмат қилади.
Мажлисда қонун лойиҳаси биринчи ўқишда концептуал жиҳатдан қабул қилинган.
Эслатиб ўтамиз, аввалроқ тадбиркорлар билан ўтказилган очиқ мулоқот давомида берилган топшириқлар ижроси бошлангани, Президент йирик тадбиркорларни Қорақалпоғистонда имтиёзлардан фойдаланган ҳолда бизнес очишга чақиргани ҳақида хабар берилганди.
Оламгир Абдиев
