Bugun, 18-avgust kuni “Kinochilar uyi”da “Baron–2:Sog‘inch” filmiga bag‘ishlangan matbuot anjumani bo‘lib o‘tdi.
Unda Kinematografiya agentligi rahbariyati, filmning prodyuseri va suratga olish guruhi qatnashib, film yaratilishi haqida ma’lumotlar berdi.
Suratga olish ishlari O‘zbekiston, Rossiya va Turkiyada olib borilgan. O‘zbekiston kino amaliyotida birinchi marta lenta raqamli va uy kinoteatrlari uchun yuqori aniqlikdagi tasvirlarni taqdim etuvchi o‘ta yuqori 4K rezolyutsiyada ishlangan. U o‘zbek razvedkachisi misolida maxsus xizmatlar vakillari missiyasining murakkabligi haqida hikoya qiladi.
“Bu film juda-juda uzoq kutilgan. Uni yaratish yo‘lida rejissyor Rustam Sagdiyev ba’zi qiyinchiliklarga duch keldi, shu sababli biz ikkinchi prodyuser izlashga majbur bo‘ldik. Biz Ivan Arxipov va uning “Inferno” prodyuserlik markazidan juda minnatdormiz, ular yuqori ishtiyoq bilan loyihani ishlab chiqarish va sarmoya kiritishda hamkorlik qildilar. Yangi g‘oyalar paydo bo‘ldi, skript sezilarli darajada kengaydi. Yana bir ijobiy tomoni shundaki, film 5 ta davlatdan eng taniqli aktyorlarni to‘plagan. “Baron-2” 18-avgust kuni Rossiya kinoteatrlarida namoyish etiladi. Bu esa Yangi O‘zbekiston kinosi tarixida ilk bor mahalliy kinoloyiha xorijiy prokatdan tushgan foydadan o‘z ulushini olishi mumkinligini anglatadi”, — deya izoh berdi O‘zbekiston Kinematografiya agentligi Bosh direktori Firdavs Abduxoliqov.
“Ushbu film global yovuzlik – terrorizmga qarshi kurashning o‘ta muhim mavzusiga bag‘ishlangan. Film ko‘pchilikning ko‘zini ochishiga va balki kimningdir hayotini saqlab qolishiga ishonaman”, - deydi prodyuser Ivan Arxipov.
Rustam Sagdiyevning ma’lum qilishicha, “Baron–2” kinofilmi ko-produksiya formatida yaratilgan bo‘lib, bu Kinematografiya agentligi rahbariyati tomonidan juda muhim qadamdir. Rossiyalik hamkorlar bilan imzolangan shartnomaga ko‘ra, kartina ikkita maqomga ega bo‘ladi - to‘liq metrajli film va serial maqomi.
Matbuot anjumanidan so‘ng barcha yig‘ilganlar “Baron–2:Sog‘inch”ning yopiq premyerasini tomosha qilishgan.
Eslatib o‘tamiz, “Ipak yo‘li durdonasi” XIV Toshkent xalqaro kinofestivali doirasida film katta ekranlarda namoyish etiladi.