Хоразмлик педофилларга нисбатан жиноят ишини кўриб чиқиш вақтинчалик тўхтатилди

 

Хоразм вилоятида икки мансабдор меҳрибонлик уйи тарбияланувчилари билан жинсий алоқа қилиб келиб, бунинг учун жуда енгил жазо олгани ҳолати апелляция инстанциясида қайта кўриб чиқилиши маълум қилинганди.

 

Олий суднинг хабар беришича, мазкур жиноят иши Жиноят-процессуал кодексининг 19-моддаси (судда жиноят ишларининг ошкора кўрилиши) талабларига мувофиқ мазкур жиноят иши ёпиқ суд мажлисида кўриб чиқилмоқда.

 

Тошкент шаҳар суди апелляция инстанциясининг суд мажлисида прокурор судга илтимоснома билан мурожаат қилиб, Жиноят-процессуал кодексининг 416-417-моддалари тартибида судланувчиларга янги айблов бўйича жиноят иши қўзғатиш ва бошқа шахсларни жиноий жавобгарликка тортиш масаласини ҳал қилиш учун жиноят иши ҳужжатларини айблов хулосасини тасдиқлаган прокурорга юбориш тўғрисида ажрим чиқаришни сўраган.

 

Қайд этилишича, апелляция инстанция судлов ҳайъати прокурор илтимосномасини қаноатлантириб, судланувчилар А. М. ва А. К. га оид жиноят иши бўйича ажрим қабул қилиб, Хоразм вилоят прокурорининг ўринбосарига юборилди ва жиноят ишини кўриш 1 ойлик муддатга тўхтатилди.

 

Маълумот учун, Хоразм вилояти адлия бошқармаси собиқ бошлиғи Ойбек Машарипов ва Янгиариқ тумани фавқулодда вазиятлар бўлими собиқ бошлиғи Анвар Қурязов Урганч шаҳридаги оилавий меҳрибонлик уйи тарбияланувчилари билан жинсий алоқа қилиб келган. Натижада Хива туман суди меҳрибонлик уйи мудирасига 5,5 йил озодликдан маҳрум қилиш жазосини берган, икки давлат амалдорига эса 1,5 йилга озодликни чеклаш (тунги вақтда уйида бўлиш) жазоси билан кифояланган эди.