Yevrokomissiya rahbari Ursula fon der Lyayen, Niderlandiya va Italiya hukumat rahbarlari hamda Tunis prezidenti Qays Said imzolagan deklaratsiyasiga ko‘ra, Tunis 900 million yevrogacha moliyaviy yordam olishi mumkin. Buning evaziga Shimoliy Afrikaning ushbu davlati muhojirlarni Yevropaga dengiz orqali noqonuniy olib o‘tish va kontrabandaga qarshi kurashga qo‘shilishi kerak.
O‘z navbatida, Said kelishuvlarni «imkon qadar tezroq» amalga oshirishga vaʼda berdi. U noqonuniy migratsiya atrofidagi vaziyatni “g‘ayriinsoniy” deb atadi va bu muammoni birgalikda hal qilish mumkin, degan fikrni bildirdi.
YEI mablag‘laridan 100 million yevro dengizda muhojirlarni qidirish va qutqarish, shuningdek, ularni o‘z vataniga qaytarish uchun yo‘naltirilishi rejalashtirilmoqda. Bu shu paytgacha Tunisga Yevropa byudjetidan ushbu maqsadlar uchun ajratilgan o‘rtacha yillik mablag‘dan uch barobar ko‘pdir.
Qayd etilishicha, joriy yilda Yevropa Ittifoqiga O‘rta Yer dengizi orqali kelgan noqonuniy muhojirlar soni keskin oshgan. Ko‘pchilik uchun Tunis tranzit nuqtasidir. Muammo ayniqsa Italiya uchun keskin. Yil boshidan buyon u yerda dengiz orqali mamlakatga kelgan 75 ming muhojir ro‘yxatga olingan. Bu ko‘rsatkich o‘tgan yilning shu davrida 31,9 ming edi.
Italiya bosh vaziri Jorja Meloni so‘zlariga ko‘ra, u Yevropa Ittifoqi Shimoliy Afrikaning boshqa davlatlari bilan Tunis kelishuviga o‘xshash shartnomalar tuza olishiga umid qilmoqda.
Qayd etilishicha, Tunisning pul olishi uchun esa boshqa masala bo‘yicha ijobiy qaror qabul qilinishi kerak. Mamlakat haligacha XVJ vaʼda qilgan 1,9 milliard dollarlik kreditni qabul qilmadi, chunki prezident Said zarur islohotlarni amalga oshirish bo‘yicha majburiyatlarni o‘z zimmasiga olmayapti, deya eslatadi dpa agentligi.