Ҳисор давлат қўриқхонаси ҳудудида учрайдиган ноёб жониворлар видео тасвирларга тушди (видео)
Ҳисор давлат қўриқхонаси илмий ходимлари ва Танхоздарё давлат назоратчилари томонидан қўйилган видео қопқонларга ноёб ҳайвонлар тасвири муҳрланди. Улар Жаҳон ва Ўзбекистон “Қизил китоби”га киритилган Қор қоплон, ТянШан қўнғир айиғи, Туркистон силовсини, оддий турдан Сибир тоғ эчкиларидир.
Мутахассисларнинг сўзларига кўра тасвирда ҳаракатлари акс этган, табиатда учрайдиган ноёб ҳайвон турларидан бири Қор қоплони – бугунги кунга келиб, ер юзида йўқолиб кетиш хавфи остида. Шу сабаб ҳам Табиатни муҳофаза қилиш Ҳалқаро иттифоқи ва Ўзбекистон Республикаси “қизил китоби”га киритилган.
Тян-Шан қўнғир айиғи эса Помир, Тянь-Шань, Ҳимолай ва Ҳисор тоғларида яшайдиган жигарранг айиқнинг алоҳида туридир. У нисбатан кичик ўлчамга эга: тана узунлиги 130 см гача, оғирлиги 250 кг гача бўлади. Ўзбекистон “Қизил китоби”га 2006 йилда камёб ва йуқолиб бораётган тур сифатида киритилган.
Мазкур “Қизил китоб”га киритилган ҳайвонларни овлаганлик учун Маъмурий жавобгарлик тўғрисидаги кодекснинг 92 моддаси билан фуқароларга базавий ҳисоблаш миқдорининг беш бараваридан ўн бараваригача, мансабдор шахсларга эса — ўн бараваридан ўн беш бараваригача миқдорда жарима солишга сабаб бўлади.
Эслатиб ўтамиз, олдинроқ Бухорода"Қизил китоб"га киритилган жониворларни сотмоқчи бўлган шахс хақида хабар бергандик.
Зайниддин Норқувватов
