Ўзбекистон ва Покистон етакчилари музокаралари якуни бўйича ОАВ вакиллари учун брифинг ўтказилди
Президент Шавкат Мирзиёев Бош вазир Имрон Хоннинг расмий ташрифини давлатлараро муносабатлар тарихида янги саҳифа очадиган муҳим сиёсий воқеа, деб баҳолади.
Ўзаро ишонч ва очиқлик, самимий ва амалий руҳда ўтган самарали музокараларда шерикликнинг янги имкониятлари кўриб чиқилиб, «ўсиш нуқталари» белгилангани қайд этилди.
Брифингда икки давлат ўртасидаги манфаатли келишувлар жумладан: Ташриф арафасида ўтган Ҳукуматлараро қўшма комиссия йиғилиши ва бизнес-форум доирасида 500 миллион доллардан ортиқ аниқ лойиҳалар бўйича келишувларга эришилган. Транзит ва савдо тўғрисидаги битим режалаштирилган улкан мақсадларга эришишга хизмат қилади.
Қишлоқ хўжалиги, уруғчилик ва чорвачилик, машинасозлик ва қурилиш, фармацевтика ва кимё, енгил саноат ва бошқа устувор соҳаларда янги қўшма лойиҳаларни амалга ошириш, ҳудудлар ўртасида тўғридан-тўғри алоқалар ўрнатишга келишилгани маълум қилинди.
«Термиз – Мозори Шариф – Кобул – Пешовар» темир йўли қурилиши масаласи ҳам атрофлича кўриб чиқилгани қайд этилди.
Хавфсизлик соҳасидаги ҳамкорликни кенгайтиришга келишиб олингани айтилди. Томонлар нуфузли халқаро ва минтақавий тузилмалар доирасида бир-бирини қўллаб-қувватлашни давом эттиришини тасдиқладилар.
