Шавкат Мирзиёев давлат ташрифи билан Ўмонга жўнаб кетди
Ташриф доирасида Масқат шаҳрида олий даражадаги музокаралар, йирик компаниялар раҳбарлари билан учрашувлар ва бошқа қўшма тадбирлар ўтказилади.

Шавкат Мирзиёев Ўмон Султони Ҳайсам бин Ториқ Ол Саиднинг таклифига биноан 16 ноябрь куни давлат ташрифи билан Ўмонга жўнаб кетди.
Ташриф дастурига мувофиқ, Масқат шаҳрида икки давлат делегациялари иштирокида олий даражадаги музокаралар бўлиб ўтади. Шунингдек, йирик компаниялар раҳбарлари ва ишбилармон доира вакиллари билан учрашувлар ҳамда бошқа қўшма тадбирлар ташкил этилади.
Бўлажак музокаралар кун тартибидан Ўзбекистон–Ўмон муносабатларини янги босқичга олиб чиқиш, савдо-иқтисодий ва инвестициявий ҳамкорликни кенгайтириш, қишлоқ хўжалиги соҳасидаги алоқаларни ривожлантириш масалалари ўрин олган.
Томонлар, шунингдек, маданий-гуманитар алоқалар ва туризм алмашинувини фаоллаштириш истиқболларини ҳам муҳокама қилади.
Музокаралар якунида икки томонлама ҳамкорликка оид бир қатор ҳужжат ва битимлар қабул қилиниши режалаштирилган.








