Абдулазиз Комилов дин эркинликлари масаласига бағишланган халқаро саммитда иштирок этди
Ўзбекистон ташқи ишлар вазири Абдулазиз Комилов Вашингтонда ташкил этилган Дин масалалари бўйича халқаро саммитда видеомурожаат шаклида иштирок этди.
Ўзбекистоннинг АҚШдаги элчихонаси хабарига кўра, саммитда шунингдек АҚШ президентни маъмурияти вакиллари, сенатор ва конгрессменлар, турли мамлакатлар вакиллари, халқаро ташкилотлар раҳбарлари ва бошқа олий мартабали меҳмонлар иштирок этишди.
Саммит иштирокчиларига Ўзбекистонда виждон эркинлиги масаласида олиб борилаётган ишлар, диний ташкилотлар фаолиятига оид қонунларнинг янада либераллашганлиги ҳақида маълумот берилди.
Саммитда иштирок этган Оқ уй вакили М.Рожерс сўнгги йилларда Ўзбекистонда соҳада амалга оширилган ижобий ўзгаришларни эътироф этди, жумладан, диний мотивлар асосида озодликдан маҳрум қилинган маҳбусларнинг озодликка чиқарилиши, қонунларнинг қайта кўриб чиқилиши каби ишлар қайд этилди. АҚШ давлат котиби Э.Бликен ҳам Ўзбекистонда диний эркинликлар масаласида жиддий ўзганишлар амалга оширилаётганига эътибор қаратди. АҚШ халқаро диний эркинлик комиссияси раиси Н.Маенза Ўзбекистон барча учун эътиқод эркинлигини таъминлаётган давлатнинг яққол намунаси дея айтиб ўтди.
