141 нафар ўзбекистонлик Россиядаги космодром яқинида ишлаш учун жўнаб кетди
Ташқи меҳнат миграцияси агентлиги ҳамда Россиянинг “Поволжское Строительное Предприятие” МЧЖ ўртасида имзоланган ҳамкорлик келишуви асосида, агентликнинг минтақавий филиалларида қурилиш соҳасида ишлаш истагида бўлган фуқаролар иштирокида танлов ўтказилганди.
Наманган вилоятида ушбу танловдан муваффақиятли ўтиб, тиббий кўрик натижалари ижобий чиққан 141 нафар фуқаро Наманган халқаро аэропортидан Россиянинг Амур вилоятида космодром атрофидаги қурилиш объектларида ишлаш учун жўнаб кетди.
Тадбирда агентликнинг Наманган вилояти филиали масъул ходимлари томонидан вақтинчалик меҳнат фаолиятини амалга ошириш учун кетаётган фуқароларга ўз йўналишлари бўйича тушунтириш, тарғибот ишлари олиб борилиб, соҳаларга оид буклет, тарқатма материаллар берилди, дейилади маълумотда.
Таъкидланишича, ушбу фуқароларни карантин манзилига жойлаштириш, рўйхатга олиш, ишлаш ҳуқуқини берувчи патент, 3 маҳал овқат, ётоқхона, махсус кийим харажатлари иш берувчи томонидан қопланади.
