Президент тадбиркорлар билан август бошида учрашади
Бу ҳақда душанба кунги брифингда президент матбуот котиби Шерзод Асадов маълум қилди, деб хабар бермоқда.
«Кўраётган бўлсангиз, Ўзбекистон президенти тадбиркорлар билан очиқ мулоқот ўтказиши ҳақида эълон бериб бораяпмиз. Ушбу учрашув август ойининг бошига мўлжалланган ва таклифлар 31 июлгача қабул қилинади», — деди у.
У шунингдек, давлат раҳбарининг ҳафталик иш режасидан ўрин олган тадбирларни ҳам очиқлади.
«Бугун Тошкент шаҳрида амалга оширилиши режалаштирилган янги лойиҳалар тақдимоти ўтказилади. Эртага давлатимиз раҳбари кон-металлургия саноати ривожи билан танишадилар», — деди Асадов.
Бундан ташқари, ҳафта мобайнида ижтимоий қўллаб-қувватлаш тизимини такомиллаштириш юзасидан йиғилиш, ҳудудлар ва тармоқларда иқтисодий ўсиш суръатларини таъминлаш бўйича видеоселектор ўтказилиши мўлжалланган.
