Зомин тоғларидаги ўрмон ёнғини аҳоли пунктига яқин келаётгани айтилмоқда

 

Аввал хабар қилганимиздек, бугун Жиззах вилоятининг Зомин туманидаги «Дуоба» ҚФЙ Ўриклисой қишлоғи дала майдонида ёнғин содир бўлди. Маълумотларга кўра, ёнғинни ўчиришга 4 та вертолёт, ФВВнинг 370 дан ортиқ ходимлари билан бирга Миллия гвардия, ИИБ, Давлат экология қўмитасидан ҳам куч ва воситалари жалб қилинган.

Ижтимоий тармоқларда тарқалган сўнгги хабарларга кўра, ёнғин аҳоли яшаш пунктига яқинлашмоқда.

ФВВ томонидан берилган маълумотларга кўра, ёнғин жойига 4 та ёнғин-қутқарув бўлинмаси ҳамда 24 нафар шахсий таркиб чиқиб кетган.

Шунингдек, ёнғин ҳудудининг кенгайиб кетишининг олдини олиш ва уни бутунлай ўчириш учун ФВВдан яна қўшимча 350 дан ортиқ шахсий таркиби, Мудофаа вазирлигидан 4 та вертолёт шунингдек, Миллия гвардия, Ички ишлар, Давлат экология қўмитаси ва бошқа ташкилотларнинг куч ва воситалари жалб этилди.

«Ҳодиса тафсилотлари тўғрисида қўшимча маълумот берилади», — дейилади хабарда.