Шифокор қон босимини туширишнинг 8 усулини тавсия этди
Швециялик шифокор Матс Халлдин артериал босимни туширишнинг 8 та усули ҳақида гапирди.
У қон босимининг симоб устунида 120/80 миллиметр бўлиши идеал босим эканини эслатиб ўтди. Агар қон босими 140/90 дан ошиб кетса, уни тушириш керак.
Шифокор бунинг учун, биринчи навбатда, камида ярим соат айланиш ёки кун давомида 3 марта 10 дақиқадан сайр қилишни тавсия этди.
Иккинчи тавсия эса смартфон ёки фитнес билагузукка қадам ўлчовчи дастурни ўрнатиб олиш ва кунига камида 10 минг қадам юришдан иборат.
Учинчиси, стрессдан қочиб, дам олишни билиш керак. Тўртинчи тавсия кун давомида айрим вақтларда телефон, компьютер ва телевизорни ўчириб қўйиш лозим.
Шунингдек, Матс Халлдин бир суткада 7 соатдан кам ухламаслик, меъёридан ортиқ овқатланмаслик ва чекишдан воз кечиш кераклигини айтган.
Шифокорнинг саккизинчи тавсияси спиртли ичимликлар истеъмол қилмасликдан иборат. Чунки алкоголь қон босимига акс таъсир ўтказади.
Шарофат Маҳмудова
