Янги ўқув йили анъанавий (офлайн) тарзда бошланадими?
Ижтимоий тармоқларда янги ўқув йили анъанавий (офлайн) тарзда бошланиши ҳақида хабарлар тарқалди. Бу ҳақда Олий ва ўрта махсус таълим вазирлиги баёнот берди.
Унда айтилишича, айни кунларда вазирлик томонидан ОТМларнинг пандемия шароитида санитария-гигиена қоидаларига риоя қилган ҳолда таълим жараёнини анъанавий (офлайн) тарзда ташкил этиш бўйича тайёргарлик ҳолати ўрганилмоқда.
Ўрганишлар натижасига кўра, тегишли маълумотлар Вазирлар Маҳкамасига тақдим этилади. ОТМларда таълим жараёнини ташкил этиш юзасидан якуний хулоса тасдиқлангандан сўнг, вазирлик сайти ва ижтимоий тармоқларидаги саҳифалари орқали расмий тарзда эълон қилинади.
Шу ўринда, вазирлик талабаларни пандемия шароитида санитария-гигиена қоидаларига қатъий риоя қилишларини, уларнинг ота-оналари ҳам фарзандлари соғлиғига масъулият билан қарашлари ва, албатта, ваксинация жараёнида фаол иштирок этишларини сўраб қолади.
«Эмлаш талабаларнинг ўзлари ҳамда профессор-ўқитувчиларнинг ҳам соғ-саломат бўлишини таъминлайди», — дейилади баёнотда.
Эслатиб ўтамиз, аввалроқ янги ўқув йилида мактаблардаги дарс жараёни гибрид шаклда давом эттирилиши ҳамда онлайн таълимнинг камчилик ва афзалликлари ҳақида хабар берилганди.
