Коронавирусни аниқлашда ишлатиладиган экспресс-тест хориждан беғараз кўмак сифатида келтирилди
“Тараққиёт стратегияси” маркази томонидан Республика Санитария-эпидемиологик осойишталик ва жамоат саломатлиги хизмати марказига коронавирус ва антитаначаларни аниқлайдиган 9600 донадан ортиқ экспресс-тест топширилди.
Ушбу экспресс-тестлар марказнинг хорижий ҳамкори томонидан беғараз тақдим қилинган бўлиб, Ўзбекистон Республикаси Ташқи ишлар вазирлиги билан ҳамкорликда мамлакатимизга олиб келинди.
Тадбирда иштирок этган Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов бундай экспресс-тестлар бугунги пандемия шароитида тезкорликни таъминлаб, касалликни ўз вақтида аниқлаш ва тегишли чораларни қисқа муддатларда кўриш имконини беришини таъкидлади.
Шунингдек, Санитария-эпидемиологик осойишталик ва жамоат саломатлиги хизмати раҳбарияти томонидан ушбу экспресс-тестларнинг мамлакатнинг 14 та ҳудудига тегишлилигича тақсимоти таъминланиб, давлат тиббиёт муассасаларида мақсадли ишлатилишига кафолат берилди.
