Дарахт – рекламалар учун жой эмас

Кейинги вақтларда ўзбошимчалик билан реклама лавҳаларини дарахтларга осиб қўйиш ҳолатлари тез-тез учраб турибди. Металл конструкцияли реклама лавҳаларини ўрнатиш учун дарахт танасига ҳар томондан михлар қоқиб қотирилади ҳамда кабель ва симлар ўтказилиб, улар ҳам дарахт танасига турли хил усулда яна бир бор мустаҳкамланади.  Бундай рекламаларни жойлаштирувчилар дарахтларнинг ҳолати ҳақида асло қайғурмайди – қўлбола усулда ясалган билбордларини осиш учун тўғридан-тўғри уларнинг танасига мих ва бурама михлар қоқиб, илгаклар билан боғлаб қўяди.

 Ўзбекистон Республикаси Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги томонидан жорий йилнинг ўтган даврида дарахтларга реклама ўрнатиш бўйича аниқланган 1300 дан ортиқ ҳолатдаги рекламалар олиб ташланди.

“Реклама тўғрисида”ги Қонунга мувофиқ, ташқи рекламани моддий маданий мерос объектлари, йўл белгилари ва светофорларга, уларнинг тиргаклари ёки ҳаракатни тартибга солиб турувчи бошқа ҳар қурилмаларга жойлаш мумкин эмас. Шунингдек, дов-дарахтларни пайҳон қилиш ва туташ ҳудуддаги ободонлаштириш воситаларини бузиш йўли билан рекламалар жойлаштириш тақиқланади.

Истеъмолчилар ҳуқуқларини ҳимоя қилиш агентлиги  томонидан Тошкент шаҳар Экология ва атроф-муҳитни муҳофаза қилиш бошқармасига  ўзбошимчалик билан ўрнатилган ноқонуний рекламаларнинг атроф-муҳитга зарар етказаётгани юзасидан тегишли чора кўрилиши бўйича хат чиқарилди.

Ўзбекистон Республикаси Вазирлар Маҳкамасининг 2020 йил 20 февралдаги  “Ташқи реклама бозорини тартибга солиш тўғрисида”ги қарорига асосан ташқи реклама объектларини (конструкцияларини) дарахтларда ўрнатишга йўл қўйилмайди.

Истеъмолчилар ҳуқуқларини ҳимоя қилиш агентлиги  реклама тарқатувчиларини табиатга зиён етказувчи ноқонуний реклама пешлавҳаларини ўрнатмасликга чақиради.

@bexatoreklamabot телеграм боти орқали сиз ташқи реклама воситаларининг дарахтда ўрнатилгани ҳақида Агентликка хабар беришингиз мумкин.