Трамп: “АҚШ Афғонистонга қайтишга тайёр туриши керак”
АҚШ ҳарбийлари Афғонистонга қайтишга тайёр бўлишлари лозим. Бу ҳақда АҚШ собиқ Президенти Дональд Трамп маълум қилди.
“Вазият тақозо қилса, биз яна (Афғонистонга) киришимиз лозим. Мамлакат Президенти (Байден) айби билан қайта киришимиз шарт, чунки у кучли армиямизнинг барчасини олиб чиқиб кетди. Агар Афғонистонга қайта кирмасак, биз 45 минг кишини бошқа кўрмаймиз”, деб айтиб ўтган собиқ Президент Алабамадаги чиқишида.
Трампнинг фикрича, ҳозирда Афғонистонда 10 минг эмас, балки 45 минг америкалик бор. Шунингдек, у АҚШ Афғонистонни тарк этиши билан Россия кириб келишидан огоҳлантирди. Аммо у Россияни шошмасликка чақирган. “Ким Афғонистонга кирса, ўша давлатга ҳеч қачон яхши бўлмаган” деган Трамп.
Бундан аввал Жозеф Байден АҚШ қўшинлари Афғонистонда 31 августдан кейин ҳам қолиши мумкинлигини маълум қилган эди.
