Ноқонуний дори воситалари манзилига етиб бормади
Тошкент вилоятининг Оҳангарон туманида жойлашган «Чинор» мунтазам йўл патруль хизмати маскани. Тунги 03:30. Навбатчилик хизматини ўтаётган ЙПХ инспектори сержант А.Камилов Наманган — Тошкент йўналишида ҳаракатланиб келаётган “KIA BONGO” русумли транспорт воситасини тўхтатади. Ҳайдовчининг ўзини тутиши инспекторда шубҳа уйғотган. Хушёр тортган инспектор ушбу автомобиль юкхонасини кўздан кечирганда ҳеч қандай ҳужжатларсиз, катта миқдорда 50 турдаги дори воситалари мавжудлиги маълум бўлган.
Мазкур ҳолат тегишли тартибда расмийлаштирилиб, ҳайдовчи, автоулов ва дори воситалари ҳолат юзасидан қонуний чора кўриш мақсадида Оҳангарон тумани ички ишлар бўлимига олиб борилган.
Дастлабки маълумотларга кўра, маҳсулотлар чет давлатда ишлаб чиқарилган ва ҳеч қандай ҳужжатлари бўлмаган тиббиёт дори воситалари экани аниқланган. Ҳолат юзасидан қўшимча суриштирув ҳаракатлари олиб борилмоқда.
Эслатиб ўтамиз, аввалроқ Тошкентда “kleksan” дори воситасини ноқонуний муомалага киритаётган шахсларнинг қўлга олингани ҳамда зангиоталик фуқаро 915 миллион сўмлик “remdesivir” дори воситасини 12 минг долларга сотишга урингани ҳақида хабар берилганди.
