Экология соҳасида жавобгарликни кучайтириш нуқтаи назаридан амалдаги қонунлар қайта кўриб чиқилади
Сенат раиси Танзила Норбоеванинг қайд этишича, сўнгги пайтларда долзарб ижтимоий-иқтисодий масалалар юзасидан мутасадди вазирлик ва идоралар раҳбарларининг ахборотларини эшитиб боришга алоҳида эътибор қаратилмоқда.
Ўтган галги сенат ялпи мажлисида дарахтларнинг ноқонуний кесилиши бўйича Экология ва атроф-муҳитни муҳофаза қилиш давлат қўмитасининг ахбороти танқидий-таҳлилий кўриб чиқилиб, қўмита фаолияти қониқарсиз деб топилган.
Ушбу масала давлатимиз раҳбари бошчилигида ўтказилган видеоселектор йиғилишида ҳам танқидий кўриб чиқилди. Хусусан, дарахтлар кесилишига жорий қилинган мораторий муддати 2024 йилга қадар узайтирилиши ва жавобгарлик кескин кучайтирилиши таъкидланди.
Шундай экан, бу борада барча бирдек масъулиятни кучайтириб, натижага ишлаш керак.
Экология соҳасида жавобгарликни кучайтириш нуқтаи назаридан амалдаги қонунлар қайта кўриб чиқилади.
Атроф-муҳит муҳофазаси, хусусан, дарахтларни асраш, яшил ҳудудларни кенгайтириш, чиқиндиларни қайта ишлаш каби қатор йўналишларда ҳудудий мутасаддиларнинг ҳисоботларини мунтазам эшитиб бориш орқали уларнинг фаолиятига баҳо бериш (керак бўлса лавозимдан четлаштириш) мақсадга мувофиқ.
Эслатиб ўтамиз, аввалроқ Шавкат Мирзиёевнинг “Янги Ўзбекистон газетасига берган интервьюсида дарахтларни кесиш, яшил ҳудудларни камайтириш ҳолатлари кўпчиликни ранжитаётгани ҳамда дарахтларни кесишда мораторий муддати 2024 йилга қадар узайтирилиши ҳақида хабар берилганди.
Баҳринисо Мадумарова тайёрлади.
